qedera serserî

gustilka bextê reş xistiyê
tiliyê min ya qereqûçkê
ey feleka şaşbûyî êdî bese
destê xwe ji sikura min berde
ey şevistanên koretarî
janêş û keserên min yên bêdeng
ji rengê te reştarîtir in
li nav rûpelên albûma jiyanê
wêneyên bêçaretiyê hatine
neqişandin
ez li tenêtiya westiyayî
xwe dispêrim dîwarê helbestên
tî û birçî
min nikarî bibim sîwarê hespekî çeleng
û çargavkî ber bi dilşadî
bextewarî
û asoya xeyalên şîrîn ve bibezînim
min ji min nepirsin
werin min ji stranên kezebperitî
ji wîzewîza bayê reş
ji guregura zîpikên reşewran
ji gurpegurpa tirsa dilê perpitî
ji qîjeqîja çûkên hêlîn wêran bûyî
û şeveder mayî
bipirsin
li ser zeviya hesretê
peşkên barana bereketê
qet nebarî
hevîrê kêf û sefaya seyrangehan
tehl û tirş bû
kevirê sebirê
li nav şewata kul û kederên birînkûr
heliya
xewnereşkên xopan
xwe li stûyê bêxewiya nav nivînan
alandiye
xweşbêhna çîçekên hewşa hinav
çilmisîn
parsûyên qefesa arezûyan
li nav mîrata axîn û nalînan
qirçeqirç in
ez bêhemdê xwe hatim
vê dinyaya derewîn
min çavê xwe li jiyana qehpik
bêwîjdan
bêdilovan
gerand
temaşa kir
û ez ê bi nefretekê
bi hêrsekê
bêkefen
bêdarbest
bêxatirxwestin bar bikim herim
nav dilê goristaneke bêxwedî
û têkevim xewa mirineke
aram û azad

2023-12-11
Stockholm