Ezîz Xemcivîn‘’Dîtin û Bîrhatin’’Pertûka Mamoste rêzdar Adil Duhokî ye, hin dîtin û Helwest û Bîrhatinên xwe tê de nivîsandine.
Bi coş min Rûpelên Pertûkê xwendin, ez ji belgehkirina Serbûrî û Bîrhatinan hez dikim û derfetek bû jî ko min hin Pêzanîn li ser Jiyana Pêşmergayetiyê û zehmetkêşana wan di dema ko Pertûk tê de hatiye nivîsandin nas kirin…
Adil Duhokî bi rastiyeke vekirî axivî ye, pesnê qehremaiya Kurdan daye, hin Bûyerên tiracîdya û diltezîn hin di Jiyana wî bi xwe û hin jî ya Hevalên wî de aniye ziman.
Pertûk ravekirineke Jiyana Partiyetiyê jî tê de heye, ji xwe piraniya wê ji Zayîna Partiya Gel heta bi Wexera wê ya dawî, ko pakrewan Samî Ebdilrehman Serokatiya wê dikir û Duhokî xal in giring li ser Kesayetiya wî û çawaniya desthilatiya wî ya tund di Partiyê de û nehêlana Hevrikan li himber xwe û mîna gelek ji Serokên Partiyên me ko nahêlin Hevalên wan yên şareza bipêş ve bikevin û destdanîna Samî ser hemû Movikên wê Partiyê, Duhokî li ser piraniya Nakokiyên xwe û yên Hevalên Partiya Gel bi Samî re peyivî ye…
Birêz A. Duhokî Rûdanên diltezîn, Komkujiyên bi Destê Rêjîma Seddam Husên çêbûne bi taybetî yên li Kampa Zêwe û li Bajarê Urmiyê li rojhelatî Kurdistanê çêbûne, hem Jiyana Pêşmergayetiyê di navbera Başûr û Rojhelatê Welat ya wê Serdemê û perîşaniya Xelkên me bi taybetî piştî têkçûna Şoreşa Kurdî bi serpereştiya Barzaniyê nemir sala 1975ê ko ew Şoreş û ew Milet bûn goriyên Peymana Cezayir û di pey re li ser hatina Xumeynî û guherîna Welatê Îranê ber bi Olê ve, û delîvekirina xelkên belengaz nivîsandiye… h.d
Çaxê min Pertûk dixwend û diketim himêza Bûyeran min nedixwest bidawî bibin, lê ji ber ko piraniya wê li ser Karê Partiyê bû hinekî ez bêzar dibûm, ji min ve wisa bû, dibe hinekî din ji wî aliyê din hez bikin…
Tev ko min dixwest Pertûk bi Pîtên Latînî baya, lê birêz Duhokî bi Pîtên Aramî nivîsandiye, hin Bûyer jî bi kurtî nivîsandine, ko ew Bûyerên giring divabû bi firehî li ser bipeyive, mîna hin Pêşmergeyên dêrîn û qehreman lê hest bûm ko çimkî ew ne ji Partiya Gel bûn birêz Duhokî Mafê wan di Pertûkê de wek ko tête xwestin nedaye wan, min dixwest Pertûk bêtir ji Nakokiyanên navxweyî yên Partiya Gel baya, eger ew Aliyê ko ez Mebest dikim berfirehtir ba wê Pertûk bêtir Cihê xwe bistanda, lê tev li wisa jî ev Dîtinên min ji Nirxê Pertûkê kêm nakin, çimkî ciwanmêr Mala wî ava be, xwe westandiye, Beşek ji Dîroka me ya windayî aşkere kiriye…
Xaleke din jî bala min kêşand, Şaşitiyên tîplêdanê, anko Şaşitiyên nivîsandinê, ez evê yekê jî nakim gunehê birêz Duhokî, dibe Rewşa ko têde nivîsandiye ji hêrsa Bûyeran nikarîbû bi hûrbînî lêvegere an bixwîne, carina yê Nivîskar çendîn car Pertûka xwe dixwîne jî lê Şaşitiyên xwe nabîne, lê ev Pertûk ji Weşanxaneyekê derketiye, çawa lêvegera wan lê nîn e, eger lêvegeriya bin û ew Şaşitî nedîtibin hêj kambaxtir e…
Awayê ko Pertûk pê hatiye nivîsandin Gelêrî ye bêtir ji Wêjeyî be, Nivîskar xwe ji Şêwezarê Civakê bidûr nexistiye, dibe jî ew wisa hez dike Ramana xwe bigehîne, ev jî nekêmasî ye, Pertûk Berhema Nivîskar a yekem e …
Bi giştî dibêjim min Pertûkek ko jidil hatiye nivîsandin xwend, û jidil jî ez pîroziya birêz Adil Duhokî dikim û bi hêvî me Karê xwe yê nivîsandinê berdewam bike…
28.03.2019
