Xûşk û birayên hêja! Mêvanên helbesta kurdî!
Nivîskar, helbestavan, hunermend û rewşebîrên rêzdar!
Medya ya kurdî bi hemî cureyên xwe! Dema we hemiyan xweş.
Em, wek komîta amadekar ya „ Roja helbesta kurdî „ bi kêfxweşî pêşwaziya we hemiyan dikin, û dibêjin, hûn bi xêr hatin, ser seran û herdu çavên me.
Hêjayan!
Îsal jî, wek erkekî rewşenbîrane me dît ku va çalakiya salane, ya ku dîroka wê vedigere sala 1993 an, dema ku helbestvanên Rojavayê welatê me, destnîşankirin ku roja koçkirina helbestvanê navdar Cegerxwîn 22. 10 an, bibe roja vejîna helbesta kurdî li vî beşî.
Helbetê gelek caran ji me tê pirsîn; gelo çima roja helbesta kurdî li beşê Rojava tenê? Ne li seranserî Kurdistanê? Bersiva me weha ye: Wek hûn dizanin di destpêka salên 90 î, ji çerxa borî, û ji ber sînorên hatine dayîn di navbera herçar beşen welatê me, û nebûna derfetên danûstandinê, ku em karibin pêşniyaza xwe bighînin hevpêşeyên xwe li beşê din, nemaze helbestvanan, loma me nav lêkir ( li Rojava ), lê îro bo me wê gelek cihê kêfxweşiyê be, ku helbestvanên beşên welatê me yên dî jî va rojê, wek roja helbesta kurdî li seranserî Kurdistanê bipijirîn. Wekî çawa ku 22 Nîsanê roja rojnamegeriya kurdî li hundir û derê welêt, ev roj jî wisa bê. 
Her dîsa di wê demê de, hêviyek hate pêş ku li duwarojê helbestvan û ronakbîrên me yê li dervayî welêt, ew jî karibin li welatên mişextiyê vê rojê vejînin. Xweşbextane ku ev bû çara pêncemîne, nivîskar û helbestvanên me li Elmanya vê rojê didûmînin û bejna helbesta kurdî bilind dikin.
Beşadrên hêja!
Dema ku em vê rojê bi bîr tînin, mebest jê ew e, ku helbestvanên me bi kêmanî salê carekê hevdu bibînin, afrandinên xwe yên nû ji hev re bixwînin, û danûstandinek di navbera nifşê nû û yê berî wan de peyda bibe. Herweha armancek me ya din jî heye, ew jî ew e; ku bi baweriya me, dema em vê rojê vedijînin em helbestvanên xwe yên giran biha mîna: Ehmedê Xanî û Nalî, Melayê Cizîrî û Hejar, Cegerxwîn û Dildar, Osman Sebrî û Ebdula Goran, Tîrêj û Qadir Koyî, Feqê Teyran û Herîrî, Qedrîcan û Pîremêr û bi dehan navên din yên hêja. Em dixwazin dilên van gişan di gorê de şa bikin. Û ji wan re bêjin: Vaye nifşên pê we, riya we girtiye berdewam dikin.
      Li dawiyê em spasiya hemî kesayetiyên pişikdarbûne di amadekirina lidarxistina va roja pîroz; nemaze „ Komela Hevaltî li Bottropê „ ku bi riya wan me ev cih girtiye. Hunermend Zubêr Salih ku bi alav û dengê xwe hazir bûye. Dîsa spasiya kesayetiyên alîkariya diravî pêşkêşî komîta amadekar kirine, herweha spasiya alavên ragihandina kurdî yên îro şahiya me bi me re parve dikin.
Her bilind be peyva kurdî