Sereke | Beşê Erebî | Beşê Çandî | Gotarekî Rêke | Erşîv

Sereke

Ger



 

 
 

Helbest u pexşan: Monolocên dîtineke beravêtî

 


 

Diyarî Ebdulkerîm Şêxo dikim

Şepal Hêvo  

1
Perçeyek ji dûyên çixareya te
bi belengaziyê re dibişkivî
Tûrê ramanên te bi jibîrkirinê re dikeniya.
Gava te pesnê xwe ji pûçbûnê re dida
hêsirên te li ser te digriyan
gotinên te yên bidarvebûyî guhên xwe digirtin
û tu bi giranbûnekê  dimeşiyayî.


2
Xirecira gavên te şev diporisandin
li rexekî rê,
dareke şikestî terqêna buharê dixwend
û li rexê din,cewrikekî reş bang dida.

3
Dengê te yê vemirî
nîşana radaneke bêcir bû.
Geh te çavên xwe ji vegerê zuha dikirin
û geh jî te çûkên xêzaniyê ji deşta bala xwe difirandin.

4
Şev jî di hêlana evîndarekî de
tembîniyên te werdigerandin
geh li te dinerî û digot:
Malneketo....
çend destan ji gijola pora te dertên
çend welat di xweziyên te de hêrifîne
çend birîn  di razana te de xilmaş bûne.
Erger reşbûna min ximava pênûsekê be
gelo wê çend şev bikarin te binivîsînin?

5
Tirên meşiya.
Çûk firiyan.                             
Tu veciniqî.

6
Mizgîniya rojeke din bû
te pala xwe dida tenahiyê
û li wir te Fatîheyek li ser şeva buhurî
dixwend.

7
Awriên te yên xirxilî
çîroka nasnameyeke birîndar
diyarî kolanên bi paye dikirin.
Kî dizane...
Bê .. Dîmenên birçîbûna te
 têra kirîna xwedayekî din dike?
Kî dizane...
 Bê ..Navê te yê sêwî ,
palgehê serê mirinê ye

8
Rengên seqet
di tabûta pirtûkeke nûjen de
salên te yên  bi cenabet diwerivandin
û ew dikirne aleke behitî ji şikestinê re
Kî dikare...
Di komara helbesta te de bijî?
Kî dikare...
Parsiwê hevokan cebar bike?

9
Bi nerxê zivistaneke zuha
te pilêta dawiyê dikirî
û tu diçûyî mêvandariya poşamniyeke xav.

10
Riyên qufilî pêşwaziya te dikirin
geh bi kulan te nîşan dikirin
geh jî di nav babîsoka qidoşiyê de
te winda dikirin.
Kî diwêre...
Nêzîkî tîna tabloyên te bibe?
Kî diwêre...
Tengbûna  mebestan nîgar bike?.

11
Hîna ew pêlên nizim
di çavên te de nalenala zarokine bej tomar dikin
û wan li xewne ker belav dikin.

12
Bijî  ji te re
te helbesta min  ji tofana  ken rizgar kir
û bi şêweyekî cadobazî
te Serûka dilbijandinên min yên çengokirî
firand.   

13
Berî keser hingafî xewliyê bibe
xwestekên te yên lal di hundrê  xwe de
barebara zarokne  badayî dikeyandin
û ew dikrine nîvişkekî tal ji demê re.
Çi maye...
Di tûrê dastana te ya qop de?
Çi maye...
Di serê êşeke pêşketî de?

14
Tiketika mijgulên te yên raketî
 baranên kurdayetiyê
diyarî oxirê dikirin
û ew dihiştin
pêşgotineke avis ji dawiyê re.

 
Gotar Nerîne Xwediyê Xwene
 

Puanên Nûçeyê

Asta Dengan: 5
Bi Tevahî Deng: 2


Ji kerema xwe re kurtedemeke xwe bide vê dengdanê:

Herî baş
Pir baş
Baş
Ne xirab
Xirab

Vebijark